Raavâdviäsuh láá steŋgejum äššigâsâin 18.4. räi masa oles enâmist vädis tavdâtile keežild
Tiedote
Tiedote 28.3.2021 Ravintolat kiinni asiakkailta 18.4. asti lähes koko maassa vakavan tautitilanteen vuoksi, inarinsaame
Tiäđáttâs 28.3.2021
Raavâdviäsuh já eres piemmâmirâttâsah kalgeh leđe steŋgejum äššigâsâin 18.4.2021 räi tain kuávluin, main tot lii velttidmettum vâi epidemia levânem ooroost.
Raavâdviäsui steŋgim lii jotkâ 9.3. álgám steŋgiimân já juátkoo tienuuvt potkânhánnáá eennâmkuudijn, main tot lii tavdâtile tiet velttidmettum. Spiekâstâssân tooleeb steŋgiimist raavâdviäsuh uážžuh leđe ávus 29.3. rääjist Ålandist já Etelä-Pohjanmaast sehe Laapist eereeb Kittâl kieldâ. Pohjois-Savost já Pohjois-Karjalast raavâdviäsuh kalgeh leđe steŋgejum äššigâsâin vuossaargâ 29.3. rääjist.
Äššigâsah pyehtih kuittâg tiiláđ já viežžâđ purrâmuš. Raavâdviäsuh já kähviviäsuh pyehtih steŋgim ääigi vyebdiđ viežžâmnáál purrâmuš njuolgist äššigâssáid tâi toimâttiđ taid jo-uv jieš teikâ eres palvâlusfällei peht äššigâssáid.
Raavâdviäsui steŋgim lii velttidmettum tavdâtile keežild
Piemmâmirâttâsah kalgeh leđe steŋgejum äššigâsâin čuávvoo eennâmkuudijn já kieldâin:
- Uusimaa
- Varsinais-Suomi
- Satakunta
- Kanta-Häme
- Pirkanmaa
- Päijät-Häme
- Kymenlaakso
- Etelä-Karjala
- Etelä-Savo
- Pohjois-Savo
- Pohjois-Karjala
- Keski-Suomi
- Pohjanmaa
- Pohjois-Pohjanmaa
- Kittâl
Steŋgim pirrâdâh iä kulluu Åland, Etelä-Pohjanmaa, Keski-Pohjanmaa já Kainuu. Toos lasseen Laapi eennâmkoddeest raavâdviäsuh pyehtih leđe ávus, eereeb Kittâl.
Laapi eennâmkode peht steŋgim kuorâttâllii tärkkilubbooht
Raavâdviäsui steŋgim lii miäruštâllum kuoskâđ oles eennâmkoodán, eereeb Laapi eennâmkoddeest. Ovdâskodde vaađâi vástádâsâst haldâttâs iävtuttâsân, ete kuhes kooskâi já härvis aassâmtávjuduv eennâmkode kalga kuorâttâllâđ tärkkilubbooht. Ovdâskode uáinu sehe tiervâsvuođâvirgeomâhái ciälkkámuš vuáđuld merideh steŋgiđ raavâdviäsuid Kittâlist, mutâ eres Laapi kieldâin raavâdviäsuh uážžuh lekkâsiđ 29.3. rääjist.
Steŋgim vuáđustâsâid tárkkojeh jyehi oho
Staatârääđi nubásmit asâttâs, jis steŋgim monnii kuávlust ij lah innig velttidmettum tâi jis tavdâtile viärrán monnii eennâmkoddeest.
Tain kuávluin, main iä steŋgii raavâdviäsuid, piemmâmirâttâsah kalgeh nuávdittiđ njuámmootavdâlaavâ já ton vuáđuld adelum njuolgâdusâid. Talle raavâdviäsuid kalga steŋgiđ tme 23 já juvâstâhvyebdim joskâđ tme 22.
Steŋgim kuáská puoh piemmâmsyergi irâttâssáid, spiekâstâssân pargoviehâraavâdviäsuh
Steŋgimnáál piemmâmirâttâsah láá eereeb iärrás kähviviäsuh, raavâdviäsuh, baarih já ijjâkerhoh, moh láá ávus aalmugân. Steŋgim kuáská meid terassijd. Viežžâmnáál purrâmuš vyebdim lii kuittâg suovvum meid steŋgim ääigi.
Spiekâstâssân láá tuš toh raavâdviäsuh, moh iä lah ávus aalmugân. Steŋgim ij te kuoskâ ovdâmerkkân puárásijviäsui purâdemsoojijd teikâ pargoviehâraavâdviäsoid, moh iä lah ávus almos aalmugân. Piemmâmirâttâsâi, moh pyevtitteh pargoviehân tâi uáppeid piemmâmpalvâlusâid, finnodâhtoimâvyevih já toimâprinsiipeh sättih mulsâšuđ merhâšitteht. Jis raavâdviäsu lii ávus aalmugân, te tot kulá steŋgim pirrâdâhân.
Sajanmáksuvyehi raavâdviäsuid lii valmâštâllâmnáál
Pargo- já iäláttâsministeriö lii valmâštâllâm toorjâvyevi kuáhtulii sajanmáávsust irâttâssáid, moid vyeimist orroo steŋgimtooimah čyeccih. Toorjâvuáhán kyeskee iävtuttâs lii eidu ovdâskode kieđâvuššâmnáál, já tot olášuttoo uássin kuástádâstorjuu. Jotkâ raavâdviäsui steŋgiimân váldoo huámmášumán toorjâvyevi jotkâvalmâštâlmist. Irâttâsah usâččii steŋgimsajanmáávsu Valtiokonttorist. Uuccâm irâttâssáid puávtáččii lekkâsiđ vyesimáánu aalgâst
Tiätu laavâ já asâttâs kieđâvušmist
Ovdâskodde tuhhiittij já täsivääldi president nonnij 28.3.2021 laavâ, moin raavâdviäsuh já eres piemmâmfinnoduvah steŋgejuvvojeh äššigâsâin koskâpuddâsávt. Laahâ já asâttâs puátih vuáimán pasepeeivi já vuossaargâ koskâsii iijâ 29.3.2021 tijme 00.00.
Staatârääđi adelij siämmáá peeivi asâttâs, mast miäruštâllojeh eennâmkodeh, main steŋgim lii vyeimist. Válduprinsiip lii, ete piemmâmirâttâsah láá steŋgejum äššigâsâin levânem- já jođálmummudo eennâmkuudijn. Velttidmettumvuođâ árvuštâlmist já miärádâstoohâm vuáđđun kiävttoo THL äššitobdeeárvuštâllâm.
Lasetiäđuh:
haldâttâsräđiolmooš Liisa Huhtala, TEM, p. 029 504 7062 (raavâdviäsui steŋgim)
ráhtulâšvuotâräđiolmooš Mikko Huuskonen, TEM, p. 0295 063 732 (koččâmušah kuástádâstorjust)
Koččâmušah já vástádâsah raavâdviäsui steŋgiimist
Lasetiäđuh piemmâmirâttâsâi raijiittâsâin STM viermisiijđoin
Lasetiätu sajanmáávsuin irâttâssáid äššigâssoojij steŋgiimist
Ovdâskode vástádâs haldâttâs iävtuttâsân laahân orroom- já piemmâmtooimâst adelum laavâ koskâpuddâsii nubásmitmist (HE 38/2021 vp; EV 28/2021 vp)
