Restraantid piijât ǩidd äʹššniiʹǩǩin 9. peeiʹv pâʹsslâšttam-mannust mäddkooʹddin, koin epidemiavueʹǩǩ lij lossumus

Tiedote 8.3.2021 Ravintolat sulkeutuvat asiakkailta 9. maaliskuuta maakunnissa, joissa epidemiatilanne on vakavin, koltansaame

Tuâjj- da jieʹllemvueʹǩǩministeria teâđtõs 8.3.2021

Restraantid da jeeʹres restranttjäärnǩid âlgg piijjâd ǩidd äʹššniiʹǩǩin 9.3.2021 ääʹljeeʹl. Lääʹǩǩ da asetõs puäʹtte viõʹǩǩe vuõssaarǥ da mââibaarǥ kõskksaž iinn čiâss 00.00. Restraant lie ǩidd äʹššniiʹǩǩin 28.3.2021 räjja tõin vuuʹdin, koin ǩidd piijjmõš lij vieʹltʼtem epidemia hoddõõvvmõõžž puõʹtǩǩeem diõtt. Täin vuuʹdin lie koronavirusepidemia leävvnem- da hooddõõvvâmpooddâst åårrai vuuʹd di Kõskk-Lääʹdd mäddkåʹdd, ko mäddkååʹddest epidemiolooglaž tiõttlååǥǥ vaʹsttee hooddõõvvâmpoodd vuuʹd. Äʹššneeʹǩǩ vuäiʹtte kuuitâǥ tiʹllʼjed da viǯǯâd porrmõõžž.

Eeʹttiǩ-kåʹdd priimi da tääʹssvääʹld presideʹntt nâânii 8.3.2021 lääʹjj, koin restraant da jeeʹres restranttjäärnǩid piijât ǩidd äʹššniiʹǩǩin kõskkpoddsânji. Riikksuåvtõs uuʹdi seämma peiʹvven asetõõzz, koʹst meäʹrtõõlât mäddkooʹddid, koin ǩidd piijjmõš lij viõǥǥâst. Tuʹmmstõktuâjj vuâđđõõvi THL äʹšštobddivuäinnmõʹšše vuuʹdi vueʹjjest.

Restranttjäärnǩid âlgg ââʹnned äʹššniiʹǩǩin ǩidd täin mäddkooʹddin: 

• Uusimaa  
• Varsinais-Suomi
• Satakunta
• Kanta-Häme 
• Pirkanmaa
• Päijät-Häme 
• Kymenlaakso  
• Etelä-Karjala 
• Etelä-Savo
• Keski-Suomi
• Etelä-Pohjanmaa
• Pohjanmaa
• Pohjois-Pohjanmaa
• Lappi
• Ahvenanmaa

Ǩidd piijjma jie kuul täk mäddkååʹdd: Pohjois-Karjala, Keski-Pohjanmaa, Kainuu da Pohjois-Savo.
Riikksuåvtõs mott asetõõzz, jos ǩidd piijjmõš koon-ne vuuʹdest ij teänab leäkku vieʹltʼtem leʹbe jos kååʹtt-ne vuʹvdd ij teänab leäkku epidemia leävvnem- leʹbe hooddõõvvâmtääʹzzest leʹbe epidemia hooddââvv koonn-ne vuâđđtääʹzz vuuʹdest. Vieʹltʼteʹmesvuõđ ärvvtõõllmõõžžâst da tuʹmmstõktuâj vuâđđan ââʹnet THL äʹšštobddiarvvlõõzz.

Vuuʹdi juâǥǥtõõllmõš epidemia vuâđđ-, leävvnem- da hooddõõvvâmpooddid vuâđđââvv  sosiaal- da tiõrvâsvuõttministeria koronaviruuzz tuõʹllstõõllâm hybridistrategia toiʹmmplaaʹne.

Ǩidd piijjmõš kuâskk pukid restranttsueʹrj põrggsid, looǥǥǩâni mieʹldd tuâjjlažkåʹddrestraantid

Ǩidd piijjâm laaǥǥan restranttpõrggâz lie jeeʹrab mieʹldd kååʹffpääiʹǩ, restraant, baar ja innbaar, kook lie äävai pukid oummid. Rajjtõs kuâskk še teraassid.

Lååǥǥain meädda lie tåʹlǩ tõk restraant, kook jie leäkku äävai pukid. Ǩidd piijjmõš ij nääiʹt kuõsk õuddmiârkkân puärrsipõõrti poorrâmpaaiʹǩid leʹbe tuâjjlažkåʹddrestraantid, kook jie leäkku äävai jeeʹres äʹššniiʹǩǩid.
Restraant da kååʹffpääiʹǩ vuäiʹtte ǩidd piijjâm ääiʹj kaaupšed viǯǯlemporrmõõžžid vuõiʹǧǧest äʹššnekka leʹbe tooiʹmted tõid juʹn-a jiõčč leʹbe jeeʹres kääzzkõstaʹrjjeeʹji mieʹldd äʹššnekka.

Mäddkooʹddin, kook jie leäkku rajjtõõzz seʹst, restranttpõrggâz vuäiʹtte leeʹd juätkast še äävai äʹššniiʹǩǩid. Täi põrggsi âlgg jääʹǩǩted rajjtõõzzid, kook lie uvddum njuämmamtauddlaaʹjjin da tõn nuäjain.

Tuâjj- da jieʹllemvueʹǩǩministeria valmštââll ǩirrseʹld tuärjjõsmaall toolkvaž koʹrvvõõzzâst põrggsid, koid ǩiddpiijjâmtooiʹm kueʹsǩǩe. Tuärjjõsmaall viiǥǥât čõõđ vueʹssen koolltuärjjõõzzâst. Halltõs oudd pâʹsslâšttam-mannu äiʹǧǧen jeeʹrab eʹtǩǩõõzz muttsin, koid läkka koolltuärjjõõzzâst tuejjeet ǩiddpiijjâmtooiʹmi diõtt.

Lââʹssteâđ:
halltõsduumšeǩ Liisa Huhtala, TEM, t. 029 504 7062
juâǥǥasjååʹđteei Antti Neimala, TEM, t. 029 504 7039
industriaduumšeǩ Mikko Huuskonen, TEM, t. 0295 063 732 (kõõččmõõžž koolltuärjjõõzzâst)

Kõõččmõõžž da vaʹsttõõzz restraanti ǩidd piijjmõõžžâst 

Riikksuåvtõõzz asetõs resttranttjäärnǩi äävaiåårrmõõžž kõskkpoddsaž rajjtummšest njuämmamtaaud leävvnummuž cõggâm diõtt 

Hallituksen esitys TEM/2021/40