Restraant ǩidd äʹššniiʹǩǩin 18.4. räjja jõnn vueʹzzest jânnam – säʹlbbvueʹǩǩ poott Kihttlest da Tâʹvv-Vuâđđmääddast

Tiedote 8.4.2021 Ravintolat kiinni asiakkailta 18.4. asti suuressa osassa maata – sulku päättyy Kittilässä ja Pohjois-Pohjanmaalla, koltansaameksi

Teâđtõs 8.4.2021

Restraant da jeeʹres tolmmjäärnaǩ(lääddas ravitsemusliike) âlgg leeʹd 18.4.2021 räjja kattum ääʹššlain tõin vuuʹdin, koin tõt lij vieʹltʼtem koronaepidemia leävvnummuž cõggmõõžž diõtt. Restraant vuäiʹtte ävvned äʹššniiʹǩǩid 9.4. 2021 Kihttlest da Tâʹvv-Vuâđđmääddast.

Tolmmjäärnaǩ âʹlǧǧe leeʹd kattum ääʹššlain pueʹtti mäddkååʹddin:

• Uusimaa
• Varsinais-Suomi
• Satakunta
• Kanta-Häme
• Pirkanmaa
• Päijät-Häme
• Kymilieʹǩǩ
• Saujj-Kaʹrjjel
• Saujj-Savo
• Tâʹvv-Savo
• Tâʹvv-Kaʹrjjel
• Kõskk-Lääʹddjânnam
• Vuâđđmädd

Säʹlbbummuž kruuʹǧǧe jie kullu Ålandd, Saujj-Vuâđđmädd, Kainuu, Kõskk-Vuâđđmädd, Lappi da Tâʹvv-Vuâđđmädd.

Riikksuåvtõs seuʹrrai mieʹrrkõõskin kõppvueʹjj ouddnummuž jeeʹres vuuʹdin. Riikksuåvtõõzzin lij lääʹjj mieʹldd õõlǥtemvuõtt muʹtted asetõõzz säʹlbbummuž kruuʹǧǧe kuulli vuuʹdin, jõs säʹlbbummuš ij leäkku teänab vieʹltʼtem leʹbe jõs kõppvueʹǩǩ mott koon-ne mäddkååʹddest tuõttsubun.

Riikksuåvtõs muuʹtti 8.4.2021 asetõõzz vuuʹdin, kook koʹlle säʹlbbummuž kruuʹǧǧe. Asetõsmuttõs vuâđđââvv tiõrvâsvuõttveʹrǧǧniiʹǩǩi aʹrvvõʹsse vuuʹdi kõppvueʹjjest. Tiõrvâsvuõđ da pueʹrrjieʹllem strooiʹtel uuʹdi ciâlkâlm kõppvueʹjjest 7.4.2021.

Säʹlbbummuš kuâskk pukid tolmmjäärnǩid, čårstõʹǩǩen persoonkåʹddrestraant

Tolmmjäärnaǩ, kook âʹlǧǧe säʹlbbeed lie jeäʹrbi mieʹldd kaaʹffpõõrt, restraant, baar da innbaar, kook lie äävai aalmja. Säʹlbbummuš kuâskk še teraassid. Restraant da kaaʹffpõõrt vuäiʹtte kuuitâǥ kaaupšed porrmõõžžid leʹbe julstõõǥǥid viǯǯâm vääras äʹššniiʹǩǩid leʹbe tååimted tõid juʹn-a jiõčč leʹbe jeeʹres kääzzkõõzztaʹrjjeei pääiʹǩ äʹššniiʹǩǩid ouddmiârkkân domoi.

Restraanti säʹlbbummuš ij kuõsk personkåʹddrestraantid, kook jie leäkku äävai aalmja. Puärrsipõõrti, hospitaaʹli, kazaarmi, tuuʹrmi, peiʹvvpõõrti da škoouli poorrâmpõõrt di jeeʹres åålǥbeällsain säʹlbbuum persoonkåʹddpoorrâmpõõrt vuäǯǯa âʹte leeʹd äävai. Tõk âʹlǧǧe kuuitâǥ jääʹǩǩted jeeʹres koronaepidemia diõtt šiõttuum rääʹjtõõzzid.

Koʹrvveem-mall restraantid lij valmštõõllâm vuâlla

Tuâjj- da jieʹllemvueʹǩǩministeria lij valmštõõllâm tuärjjõsmaall mååžna koʹrvvõõzzâst põrggsid, kooi äʹššneʹǩsââʹjj lie säʹlbbuum lääʹjj leʹbe veʹrǧǧneeʹǩǩ meärrõõzzin. Halltõõzz eʹtǩǩõs lij samai ååʹn eeʹttiǩkååʹdd ǩiõttʼtõõllâm vueʹlnn. Ođđ säʹlbbeemkoʹrvvõs kuõskči uʹcc põrggsid da mikropõrggsid, koin lie jäänmõsân 49 tuâjjla. Šuurab põrggsid valmštõõlât pååđai tuärjjõs nuʹtt jåʹttlânji ko vueiʹtet.

Säʹlbbeemkoʹrvvõõzz ooccmõš ävvan põrggsid vueʹssmannust. Põõrǥâs vuäiʹtte ooccâd tõn Riikk-konttrest.

Lââʹssteâđ: 
halltõsduumšeǩ Liisa Huhtala, TEM, teʹl. 029 504 7062 
tuâjjministeeʹr spesiaalvieʹǩǩteei Piia Rekilä, teʹl. 050 396 3574
industriiduumšeǩ Mikko Huuskonen, TEM, teʹl. 0295 063 732, kõõččmõõžž säʹlbbeemkoʹrvvõõzzâst

Riikksuåvtõõzz asetõs tolmmjäärnǩi äävaiåårrmõõžž kõskkpoddsâž rääʹjtummšest paššnemkõõv leävvnummuž cõggmõʹšše 
Kõõččmõõžž da vaʹsttõõzz restraanti säʹlbbummšest da säʹlbbeemkoʹrvvõõzzâst
Mäddkartt restraanti rääʹjtõõzzin