Hyppää sisältöön
Media

Restoráŋŋat gitta áššehasain 18.4. rádjai stuorra oasis riikka – gidden nohká Gihttelis ja Davvebađaeatnamis

14.4.2021 12.49
Tiedote

Tiedote 8.4.2021 Ravintolat kiinni asiakkailta 18.4. asti suuressa osassa maata – sulku päättyy Kittilässä ja Pohjois-Pohjanmaalla, pohjoissaameksi

Dieđáhus 8.4.2021

Restoráŋŋaid ja earáid biebmanfitnodagaid galgá doallat 18.4.2021 rádjai gitta áššehasain dain guovlluin, gos dat lea vealtameahttun koronaepidemiija leavvama eastadeapmin. Restoráŋŋat sáhttet rahpasit áššehasaide 9.4.2021 Gihttelis ja Davvebađaeatnamis.

Biebmanfitnodagaid galgá doallat gitta áššehasain čuovvovaš eanangottiin:

  • Uusimaa
  • Áitosaš-Suopma
  • Satakunta
  • Kanta-Häme
  • Pirkanmaa
  • Päijät-Häme
  • Kymenlaakso
  • Mátta-Gárjil
  • Mátta-Savo
  • Davvi-Savo
  • Davvi-Gárjil
  • Gaska-Suopma
  • Nuortabađaeana

Giddema birii eai gula Ålanda, Lulle-Bađaeana. Kainuu, Gaska-Bađaeana, Lappi ja Davvebađaeana.

Stáhtaráđđi čuovvu njuolggaduslaččat dávdadili ovdáneami eará guovlluin. Stáhtaráđis lea lága mielde geatnegasvuohta nuppástuhttit ásahusa giddema birii gullevaš guovlluin, jos gidden ii leat šat vealtameahttun dahje jos dávdadilli nuppástuvvá man nu eanangottiin duođalabbon. 

Stáhtaráđđi nuppástuhtii 8.4.2021 ásahusa guovlluin, mat gullet giddema birii. Ásahusnuppástus vuođđuduvvá dearvvašvuođavirgeoapmahaččaid árvvoštallamii guovlluid dávdadilis. Dearvvašvuođa ja buresveadjima lágádus attii cealkámuša dávdadilis 7.4.2021.

Gidden guoská buot biebmansuorggi fitnodagaid, spiehkastahkan bargiidrestoráŋŋat

Biebmanfitnodagat maid galgá giddet leat earet eará kafeat, bárat ja idjaklubbat, mat leat rabas olbmuide. Gidden guoská maiddái terássaid. Restoráŋŋat ja kafeat sáhttet goittotge vuovdit borramušaid dahje juhkamušaid fárrui njuolga áššehassii dahje doaimmahit daid juogo ieš dahje earáid bálvalusfálliid bokte áššehassii ovdamearkka dihtii ruoktot.

Restoráŋŋaid gidden ii guoskkat bargiidrestoráŋŋaid, mat eai leat rabas almmolaččat. Boarrásiidsiiddaid, buohcceviesuid, garnisovnnaid, fáŋgaliid, beaiveruovttuid ja skuvllaid kantiinnaid ja earáid olggobeale olbmuin giddejuvvon bargoveahkaborranbáikkit sáhttet nie leat rabas. Dat galget goittotge čuovvut earáid koronaepidemiija dihtii ásahuvvon ráddjehusaid.

Buhtadusmálle restoráŋŋaide lea válmmaštallamis

Bargo- ja ealáhusministeriija lea válmmaštallan doarjjamálle govttolaš buhtadusas fitnodagaide, maid áššehasdilit leat giddejuvvon lága dahje virgeoapmahačča mearrádusain. Ráđđehusa evttohus lea bárrásiin riikkabeivviid gieđahallamis. Ođđa giddenbuhtadus guoskkašii smávva fitnodagaid ja mikrofitnodagaid, main leat eanemustá 49 bargi. Stuorát fitnodagaide válmmaštallat sierra doarjaga nu jođánit go vejolaš.

Giddenbuhtadusa ohcan rahpasa fitnodagaide miessemánus. Fitnodagat sáhttet ohcat dan Stáhtakantuvrras.

Lassedieđut:
hálddahusráđđeolmmoš Liisa Huhtala, BEM, tlf. 029 504 7062
bargoministara earenoamášveahkki Piia Rekilä, tlf. 050 396 3574
industriijaráđđeolmmoš Mikko Huuskonen, BEM, tlf. 0295 063 732, gažaldagat giddenbuhtadusas

Stáhtaráđi ásahus biebmanfitnodagaid rabasáiggi gaskaboddasaš ráddjemis njoammudávdda leavvama eastadeapmin 
Gažaldagat ja vástádusat restoráŋŋaid giddemis ja giddenbuhtadusas 
Kárta restoráŋŋaid ráddjehusain 

Tiedote
Sivun alkuun