Raavâdviäsuh pyehtih leđe áávus äššigâssáid raijiittâsâiguin oles enâmist vuossaargâ 19.4. rääjist

Tiedote 15.4.2021 Ravintolat voivat olla auki asiakkaille rajoituksin koko maassa maanantaista 19.4. alkaen, inarinsaameksi

Tiäđáttâs 15.4.2021

Raavâdviäsuid já eres piemmâmirâttâsâid kalga toollâđ pasepeeivi 18.4.2021 räi steŋgejum tain kuávluin, main tot lii velttidmettum amas koronaepidemia levâniđ.  
Steŋgim nohá Pohjois-Savost vástuppeeivi 16.4.2021 kuávlu tavdâtile puáránem keežild.

Raavâdviäsuid puáhtá lekkâđ äššigâssáid jyehi kuávlust Suomâst vuossaargâ 19.4.2021. Talle kalga nuávdittiđ koskâpuddâsijd raijiittâsâid, moh kyeskih ávusoromân, juvâstâhvyebdimaigijd, äššigâsâi oromân já jotemân raavâdviäsu tiilijn já äššigâspäikkimeerijd.

Raavâdviäsusteŋgim vyeimist kuávluin, main tavdâtile lii viärráámus

Raavâdviäsui já eres piemmâmirâttâsâi koskâpuddâsii steŋgiimist lii asâttum orroom- ja piemmâmtooimâst adelum laavâst. Staatârääđist lii laavâ mield kenigâsvuotâ mutteđ asâttâs steŋgim olán kullee kuávluin, jis steŋgim ij innig lah eennâmkoddeest velttidmettum.

Tiervâsvuođâ já pyereestvaijeem lájádâs adelij koskoho 14.4.2021 uđđâsumos áárvu kuávlui tavdâtiileest. Ton vuáđuld steŋgim ij lah innig velttidmettum Pohjois-Savost. Tondiet staatârääđi muttij tuorâstuv 15.4.2021 asâttâs, mii miäruštâl kuávluid steŋgim ooleest.
Piemmâmirâttâsah kalgeh leđe steŋgejum äššigâsâin čuávvoo eennâmkuudijn pasepeeivi 18.4.2021 räi:

• Uusimaa
• Varsinais-Suomi
• Satakunta
• Kanta-Häme
• Pirkanmaa
• Päijät-Häme
• Kymenlaakso
• Etelä-Karjala
• Etelä-Savo
• Pohjois-Karjala
• Keski-Suomi
• Pohjanmaa.

Steŋgim olán iä kulluu Åland, Etelä-Pohjanmaa, Kainuu, Keski-Pohjanmaa, Lappi, Pohjois-Pohjanmaa já Pohjois-Savo. Tain eennâmkuudijn piemmâmirâttâsah kalgeh nuávdittiđ raijiittâsâid, moh láá adelum njuámmootavdâlavváin já ton vuáđuld.

Raijiittâsah ávusoromân, juvâstâhvyebdimaigijd já äššigâssajemeerijd

Steŋgim nuuhâm maŋa piemmâmirâttâsâi raijiittâsâid juátkih njuámmootavdâlaavâ já ton vuáđuld adelemnáál staatârääđi asâttâs njuolgâdusâiguin. Täsivääldi president lii tárguttâs nonniđ njuámmootavdâlaavâ nubástusâid vástuppeeivi 16.4.2021. Laavâ nonnim maŋa staatârääđi puáhtá adeliđ vástuppeeivi asâttâs, mast tärhibeht asâtteh piemmâmirâttâsâi raijiittâsâin kuávlui mield. Lii tárguttâs, ete taah raijiittâsah puátih vuáimán tállân vuossaargâ 19.4.2021 steŋgim nuuhâm maŋa.

Sosiaal- já tiervâsvuođâministeriö viestâd raavâdviäsui toimâraijiittâsâin vástuppeeivi 16.4.2021.

Steŋgimsajanmáávsu uuccâm lekkâs 12.5.

Raavâdviäsuh já eres lavváin tâi virgeomâhâšmiärádâssáin steŋgejum irâttâsah pyehtih finniđ steŋgimsajanmáávsu. Uđđâ steŋgimsajanmáksu kuáská uccâ irâttâssáid já mikroirâttâssáid, main láá enâmustáá 49 parged.

Steŋgimsajanmáávsu uuccâmäigi álgá 12.5.2021. Irâttâsah oceh sajanmáávsu Valtiokonttorist.

Stuárráábij irâttâsâi steŋgimsajanmáksu lii valmâštâllâmnáál. Pargo- já iäláttâsministeriö ráđádâl eidu Euroop komissioin stuorrâ irâttâsâi torjuu iävtuin já enâmusmeereest.

Lasetiäđuh:
haldâttâsräđiolmooš Liisa Huhtala, TEM, p. 029 504 7062, raavâdviäsui steŋgim
haldâttâsräđiolmooš Ismo Tuominen, STM, ovdânommâ.suhânommâ@stm.fi, raijiittâsah njuámmootavdâlavváin
ráhtulâšvuotâräđiolmooš Mikko Huuskonen, TEM, p. 0295 063 732, steŋgimsajanmáksu

Koččâmušah já vástádâsah raavâdviäsui steŋgiimist 
Raavâdviäsuraijiittâsah eennâmkuudij mield 
Staatârääđi asâttâs piemmâmirâttâsâi ávusorroom koskâpuddâsii raijiimist njuámmootaavdâ levânem estimân adelum staatârääđi asâttâs 2 § nubásmitmist almostittoo pargo- já iäláttâsministeriö miärádâsah-siijđost