Goasttádusdoarjaga ja giddenbuhtadusa ohcamat rahpasit fitnodagaide cuoŋo–miessemánus

Tiedote 9.4.2021 Kustannustuen ja sulkemiskorvauksen haut aukeavat yrityksille huhti-toukokuussa, pohjoissaameksi

Dieđáhus 9.4.2021

Goasttádusdoarjja lea oaivvilduvvon fitnodagaide, maid gávpejohtu lea geahppánan badjel 30 proseantta koronaepidemiija dihtii. Giddenbuhtadusa sáhttet ohcat mikro- ja smávvafitnodagat, maid áššehaskonttut leat giddejuvvon lága dahje virgeoapmahačča mearrádusas. Goasttádusdoarjaga goalmmát ohcanjorus rahpasa 27.4.2021 ja giddenbuhtadusa 12.5.2021. Fitnodagat ohcet guktuid doarjagiid Stáhtakantuvrras. 

Goasttádusdoarjjaláhkii leat dahkkojuvvon nuppástusat, mat dahket vejolažžan doarjaga mieđiheami njuovžileappot ovtta olbmo fitnodagaide ja smávvafitnodagaide ja ođđa giddenbuhtadusa koronaepidemiija dihtii giddejuvvon fitnodagaide. Dásseválddi presideanta nannii goasttádusdoarjjalága nuppástusaid 9.4.2021, ja láhka boahtá fápmui 12.4.2021.

— Mii leat beaivádan goasttádusdoarjaga vástidit dán muttu dárbbuid. Dat vuhtiiváldá dál buorebut sihke smávva ja stuorra fitnodagaid. Lassin oažžut bargoneavvokássii buhtadusa smávva fitnodagaide, maid virgeoapmahaččat leat gidden korona dihtii. Mii válmmaštallat bárrásiin maiddái stuorra fitnodagaid giddenbuhtadusa ja dáhpáhusdáhkádusa, dadjá ealáhusministtar Mika Lintilä. 

— Stáhtakantuvrras lea vásihus goasttádusdoarjaga mávssiheamis juo guovtte árat jorrosis. Min ožžon áššehasmáhcahaga vuođul leat lihkostuvvan barggus bures. Dan dihtii mii váldit mielas bargun goalmmát goasttádusdoarjaga lassin maiddái ođđa giddenbuhtadusa mávssiheami, dadjá doaibmasuorgehoavda Jyri Tapper Stáhtakantuvrras.

Goasttádusdoarjja fitnodagaide, maid gávpejohtu lea geahppánan

Goasttádusdoarjaga goalmmát ohcanjorus lea oaivvilduvvon fitnodagaide, maid gávpejohtu lea koronapandemiija dihtii njiedjan badjel 30 proseantta doarjjabajis 1.11.2020–28.2.2021, go dan veardiduvvo váldonjuolggaduslaččat vástideaddji áigemuddui jagiin 2019–2020.

Buot doaibmasurggiid fitnodagat sáhttet ohcat goasttádusdoarjaga. Stáhtaráđđi addá cuoŋománus ásahusa doaibmasurggiin mat sáhttet ohcat doarjaga lasseákkastallama haga. Dát leat doaibmasuorggit, máid gávpejohtu lea geahppánan unnimustá 10 proseantta doarjjabajis. Jos fitnodat ii gula ásahusas meroštallon doaibmasuorgái, dan galgá ákkastallat sierra gávpejođu geahppáneami korona dihtii.
 
Goasttádusdoarjja lea buhtadus fitnodaga njuovžilmeahttun goasttádusain ja bálkágoluin muhto dainna ii buhtaduvvo gávpejođu geahppáneami. Njuovžilmeahttun goasttádusat leat dál meroštallon lágas ain dárkilabbot. Lassin bargoaddi siidogoluin, dego sosiáladorvomávssuin ja bargodearvvašvuođagoasttádusain, sáhttit boahttevuođas buhtadit dihto ossodaga.

Ovtta olbmo fitnodagat ohcet doarjaga joatkagis Stáhtakantuvrras

Goasttádusdoarjaga máksojuvvo fitnodagaide unnimustá 2000 euro, jos doarjjaeavttut divvet. Dát álkidahttá earenoamážit ovtta olbmo fitnodagaid dili. Doarjja mieđihuvvo fitnodagaid gávpejođu geahppáneami ja ollašuvvan goasttádusaid mielde.

Vai fitnodat sáhtašii ohcat goasttádusdoarjaga, das ferte leat Y-dovddaldat. Gáibádussan lea maiddái, ahte fitnodagas lea doarjjabajis dohkkehahtti goasttádusat unnimustá 2000 euro. 

Doarjaga eanemusmearri stuorru, mii bealistis vástida earenoamážit stuorra fitnodagaid dárbbuide. Fitnodat sáhttá oažžut doarjaga miljovnna euro, go árat ohcanjorrosiin badjerádjá lea leamašan 500 000 euro.

Restoráŋŋat ja earát giddejuvvon fitnodagat sáhttet oažžut giddenbuhtadusa

Fitnodagaide máksojuvvo buhtadus, jos daid doaibmasajiid galgá lága dahje virgeoapmahašmearrádusa geažil doallat gitta koronavirusepidemiija dihtii. Ođđa giddenbuhtadus guoská smávva fitnodagaid ja mikrofitnodagaid, main leat eanemustá 49 bargi. Giddejuvvon fitnodagat sáhttet ohcat maiddái goasttádusdoarjaga.

Stuorát fitnodagaid giddenbuhtadus lea válmmaštallamis. Bargo- ja ealáhusministeriija ráđđádallá bárrásiin Eurohpá kommišuvnnain stuorra fitnodagaid doarjaga eavttuin ja eanemusmearis. 

Giddenbuhtadus guoská restoráŋŋaid ja earáid biebmanfitnodagaid, mat leat giddejuvvon gaskaboddasaččat áššehasain idjadan- ja biebmandoaibmamis addojuvvon lágain. Borramuša vuovdin fárrui lea goittotge lobálaš. Buhtadus rehkenasto dan doaibmma oasis, man gidden guoská.

Buhtadusa sáhttit máksit maiddái fitnodagaide, maid gielda dahje guovlohálddahusdoaimmahat lea mearridan bidjat gitta njoammudávdalága vuođul. Dát leat ovdamearkka dihtii lihkadan- ja valáštallansajit ja álšasálet, almmolaš sávnnit, vuojadanhállat ja lávggohagat ja sistoahkanpárkkat. 

Giddenbuhtadus vuođđuduvvá fitnodaga goluide guovvamánus 2021 

Buhtadus máksojuvvo fitnodagaide dan áiggis, man dat leat gitta. Jos fitnodagaid áššehasmeari lea ráddjejuvvon, muhto dat eai leat ollásit gitta, dat eai leat giddenbuhtadusa bires.

Giddenbuhtadus vuođđuduvvá fitnodaga goluide guovvamánus 2021 ja almmuhussii das, man stuorra oasi gávpejođus gidden guoská. Bálkágoluin buhtaduvvo 100 proseantta ja earáin goluin, dego láigogoluin, 70 proseantta. 

Sihke goasttádusdoarjaga ja giddenbuhtadusa mearis vuhtiiváldojuvvojit árabut mieđihuvvon koronadoarjagat. Doarjagiid eanemusmearri ii oaččo mannat badjel 1,8 miljovnna euro EU stáhtadoarjjanjuolggadusaid mielde.

Goasttádusdoarjaga ohcan lea jođus 23.6.2021 rádjai. Giddenbuhtadusa galgá ohcat njealji mánotbaji siste dan kaleanddarmánu nohkamis, goas geatnegasvuohta doallat doaibmasajiid gitta nogai.

Goasttádusdoarjaga vuosttamuš ohcanjorus ordnejuvvui suoidne-borgemánus 2020. Nubbi vulggii johtui juovlamánus 2020 ja nogai guovvamánus 2021. Goalmmát ohcanjorrosii ja giddenbuhtadussii lea várrejuvvon ruhta oktiibuot 356 miljovnna euro. 

Lassedieđut:
ealáhusministeriija earenoamášveahkki Jenny Hasu, tlf. 029 504 7213
industriijaráđđeolmmoš Mikko Huuskonen, BEM, tlf. 029 506 3732
njunuš áššedovdi Maija Lönnqvist, BEM, tlf. 050 331 3791

Láhka goasttádusdoarjagis
Gažaldagat ja vástádusat goasttádusdoarjagis ja giddenbuhtadusas
Doaibmanrávvagat fitnodagaide koronadilis 
Dillediehtu fitnodatruhtadeamis koronadilis
Stáhtakantuvrra goasttádusdoarjjasiiddut haekustannustukea.fi 
Stáhtakantuvrra giddenbuhtadussiiddut valtiokonttori.fi/sulkemiskorvaus